Posts

பொங்கல் பரிசு ரூ.2,500 கிடைக்கலயா? புகார் எண் அறிமுகம்!

பொங்கல் பரிசு ரூ.2,500 கிடைக்கலயா? புகார் எண் அறிமுகம்!

தமிழகத்தில் அடுத்த சில மாதங்களில் சட்டமன்ற தேர்தல் நடைபெறவுள்ளது. இதற்கான பணிகளில் அதிமுக, திமுக உள்ளிட்ட அரசியல் கட்சிகள் தீவிரமாக ஈடுபட்டுள்ளன. பொதுமக்களைக் கவரும் வகையில் தேர்தல் அறிக்கை தயாரிக்கும் பணிகள் முடுக்கி விடப்பட்டுள்ளன. இந்த சூழலில் யாரும் எதிர்பார்க்காத வண்ணம் பொங்கல் பரிசுத் தொகுப்புடன் 2,500 ரூபாய் ரொக்கம் வழங்கப்படும் என்று தமிழக மக்களுக்கு முதல்வர்

எடப்பாடி பழனிசாமி இன்ப அதிர்ச்சி கொடுத்தார். இதற்காக தமிழக அரசு சார்பில் 5,600 கோடி ரூபாய் நிதி ஒதுக்கீடு செய்யப்பட்டுள்ளது.


வழக்கமாக பொங்கல் பரிசாக 1,000 ரூபாய் மட்டுமே அளிக்கப்படும் நிலையில், இரண்டரை மடங்கு உயர்த்தி அறிவித்தது தேர்தலை ஒட்டி வெளியிடப்பட்ட சுயநல அறிவிப்பே என்று எதிர்க்கட்சிகள் குற்றம்சாட்டின. இதற்கிடையில் பொங்கல் பரிசு டோக்கன் வழங்கும் பணிகள் வீடு வீடாகச் சென்று வழங்கப்பட்டன. வரும் 4ஆம் தேதி முதல் 12ஆம் தேதி வரை ரேஷன் கடைகளில் பரிசுத் தொகுப்பை பெற்றுக் கொள்ளலாம்.


நாள்தோறும் 200 பேர் வீதம் பரிசுத் தொகுப்பு வழங்கப்படவுள்ளது. இந்த தேதிகளில் பெறத் தவறியவர்கள் 13ஆம் தேதி பெற்றுக் கொள்ளலாம் என்று தெரிவிக்கப்பட்டுள்ளது. பொங்கல் பரிசுத் தொகுப்பில் ஒரு கிலோ பச்சரிசி, ஒரு கிலோ சர்க்கரை, தலா 20 கிராம் முந்திரி திராட்சை, 5 கிராம் ஏலக்காய், ஒரு முழு நீளக் கரும்பு ஆகியவை அடங்கும்.


இதற்கிடையில் ரேஷன் கடை ஊழியர்கள் தங்களின் சம்பள உயர்வு பிரச்சினையை முன்னிறுத்தி போர்க்கொடி உயர்த்தினர். இவர்களை சமாதானப்படுத்தும் நடவடிக்கையில் மாநில அரசு ஈடுபட்டுள்ளதாக கூறப்படுகிறது. இதற்கிடையில் பொங்கல் பரிசு வழங்க தேவையான நிதி, அந்தந்த மாவட்ட கூட்டுறவு வங்கிக் கணக்கில் செலுத்தப்பட்டது.

இந்நிலையில் பொங்கல் பரிசு தொகுப்பு, டோக்கன் தொடர்பாக தகவல் மற்றும் புகார் ஏதேனும் இருந்தால் 044-2766240 என்ற மாவட்ட கட்டுப்பாட்டு அறை தொலைபேசி எண் மூலம் தொடர்பு கொள்ளலாம் என்று நுகர்வோர் பாதுகாப்பு அலுவலகம் அறிவித்துள்ளது.

        Post a Comment

        © Daily News. All rights reserved. Developed by Jago Desain